‘Dhruvikrit duniya mein bhi Bharat ne banai aam sahamati’ — BRICS summit ki safalta par bole Jaishankar

32 delegation ne liya hissa

Mediakarmiyon se batchit mein Jaishankar ne bataya ki summit mein kul 32 delegation shamil hue, jinmein 11 sadasya desh, 10 partner desh, char kshetriya sangathan aur saat antarrashtriya sangathan shamil the. Unhone kaha ki zyadaatar deshon ka pratinidhitva rashtradhyaksh ya shasanadhyaksh star par hua, jo pradhan mantri Narendra Modi ke netritva wale Bharat ki “mazboot convening power” ko darshata hai.

Summit mein shamil hone wale pramukh netaon mein Russia ke rashtrapati Vladimir Putin, China ke rashtrapati Xi Jinping, Indonesia ke rashtrapati Prabowo Subianto, Dakshin Africa ke rashtrapati Cyril Ramaphosa, Iran ke rashtrapati Masoud Pezeshkian, Ethiopia ke pradhan mantri Abiy Ahmed Ali, Misr ke rashtrapati Abdel Fattah el-Sisi aur Abu Dhabi ke Crown Prince Sheikh Khaled bin Mohamed bin Zayed Al Nahyan ka naam shamil hai. Jaishankar ne sanyukt rashtra mahasachiv Antonio Guterres samet anya antarrashtriya sangathanon ke pramukhon ki maujoodgi ka bhi vishesh roop se zikr kiya.

Aatankwad par bani aham sahamati

Jaishankar ne bataya ki dhruvikaran ke bavjood BRICS neta sabse mushkil mudde — Pashchim Asia sankat — par bhi ek sajha bayan jari karne mein safal rahe, jismein shanti, suraksha aur sthirta ki appeal ki gayi. Unhone yeh bhi bataya ki BRICS deshon ne aatankwad ke har roop ko apradhik kritya batate hue spasht sahamati jatai aur Pahalgam hamle ki asweekaryata ko bhi spasht roop se sweekar kiya.

Summit ke pehle hi din sadasya deshon ne aapsi matbhedon ke bavjood sarvsammati se ‘New Delhi Ghoshnapatra’ (New Delhi Declaration) ko apnaya. Jaishankar ke anusar, sudhar (reform) aur lachilapan (resilience) do aise sajha vishay rahe jinhone alag-alag hiton wale deshon ko ek manch par lane mein aham bhumika nibhai.

Aarthik aur takniki agende par raha focus

Videsh mantri ne bataya ki summit ka agenda mukhya roop se arthvyavastha, vikas aur taknik par kendrit raha, jismein Global South ke hiton ko khas tavajjo di gayi. Unhone ise ek “bahut mazboot sandesh” karar diya. Jaishankar ne kaha ki summit ka safal samapan badhte antarrashtriya tanav ke beech deshon ko ek sath lane ki Bharat ki kshamta ko rekhankit karta hai aur vaishvik aarthik vikas, taknik tatha Global South se jude muddon par charcha ko aakar dene mein Bharat ki badhti bhumika ko bhi darshata hai.

Ullekhniya hai ki America ke Dakshin Asia mamlon ke vishleshak Michael Kugelman ne bhi is summit mein jari New Delhi Ghoshnapatra ko Bharat ke liye ek badi kootnitik uplabdhi bataya hai.