Gangotri highway par bhishan hadsa, Bhagirathi nadi mein giri Innova; 4 ki maut, 1 gambhir ghayal, 2 mahilayein lapata

Prarambhik jankari ke mutabik, car mein sawar yatri Gujarat ke rehne wale the aur Gangotri dham ke darshan ke liye Uttarkashi se aage ja rahe the. Hadse ki soochna milte hi police, rajya aapda prativadan bal (SDRF), rashtriya aapda mochan bal (NDRF) aur jila prashasan ki teemein mauke par pahunch gayin.

Kareeb 200 meter gehri khai mein giri car

Hadsa Uttarkashi jile ki Bhatwari tehsil mein Gangnani ke paas hua. Bataya ja raha hai ki Innova car achanak aniyantrit ho gayi aur sadak se neeche gehri khai mein ja giri. Iske baad vahan Bhagirathi nadi mein sama gaya.

Durghatna ki jankari subah kareeb 7 baje aapatkalin sanchalan kendra ko mili. Iske baad rahat evam bachav dalon ko tatkal ghatnasthal par ravana kiya gaya. Nadi ka tej bahav aur durgam ilaka bachav abhiyan mein chunauti bana hua hai.

Char logon ke shav baramad, ghayal yuvak AIIMS Rishikesh refer

Rescue abhiyan ke dauran ab tak char logon ke shav nadi kinare se baramad kiye gaye hain. Ek 17 varshiya yuvak ko gambhir halat mein surakshit bahar nikala gaya. Use prathmik upchar ke baad helicopter se AIIMS Rishikesh bheja gaya hai.

Hadse mein lapata do mahilaon ki talash ke liye SDRF, NDRF, jal police aur prashikshit gotakhoron ki teemein nadi mein search operation chala rahi hain. Jila prashasan poore bachav abhiyan ki nigrani kar raha hai.

Mritakon, ghayal aur lapata logon ki pehchan

Prashasan ki or se uplabdh jankari ke anusar, hadse mein jaan ganwane wale char logon ki pehchan hui hai.

Mritak:

1. Ashokben Patel (49 varsh), nivasi Surat, Gujarat

2. Rutika Ashokbhai Patel (19 varsh), nivasi Surat, Gujarat

3. Ghanshyambhai Sarwaliya (32 varsh), nivasi Gujarat

4. Surendra Singh, nivasi Haridwar (vahan chalak)

Ghayal:

– Vedant Ashokbhai Patel (17 varsh), nivasi Gujarat. Unhein gambhir halat mein AIIMS Rishikesh refer kiya gaya hai.

Lapata:

1. Sudhaben Ashokbhai Patel (45 varsh), nivasi Gujarat

2. Kiranben Vishalbhai Patel (34 varsh), nivasi Surendranagar, Gujarat

Lapata mahilaon ki talash mein juti bachav teemein

Hadse ke baad se hi Bhagirathi nadi aur aaspaas ke sambhavit ilakon mein lagatar talashi abhiyan chalaya ja raha hai. Tej bahav ke karan bachav dalon ko kaafi mushkilon ka samna karna pad raha hai.

Prashasan ke mutabik, lapata dono mahilaon ka pata lagane ke liye sabhi uplabdh sansadhano ki madad li ja rahi hai. Filhal hadse ke karanon ka pata nahi chal paya hai. Police durghatna ki paristhitiyon ki jaanch kar rahi hai.