Tajganj: Mook aur mansik roop se kamzor yuvati se dushkarm ke doshi ko 10 saal ki kathor kaid, isharon aur behen ke likhe bayan ko adalat ne mana pukhta saboot

Kya tha mamla

Tajganj thane mein darj prathmiki ke anusar, ghatna 20 May 2024 ki dopahar ki hai. Yuvati ke pita ne aarop lagaya tha ki vah us samay ghar ke bahar so rahe the. Patni mayke mein thin aur parivar ke baki sadasya kaam se bahar the. Ghar mein 18 saal ki beti akeli thi, jo mansik roop se kamzor aur mook hai.

Shikayat mein kaha gaya ki pados mein dukan chalane wala Govinda urf Hargovind ghar mein ghusa aur yuvati se dushkarm kiya. Pita ke mutabik, neend khulne par vah andar gaye to aaropi unhein dekhkar bhag gaya. Beti rote hue unke paas pahunchi. Baad mein chhoti beti ne poochha to peedita ne isharon mein ghatna ki jankari di.

Adalat mein kaise sabit hua mamla

Vivechak ne 12 June 2024 ko vivechna poori kar adalat mein aarop-patra dakhil kiya. Abhiyojan paksh ne peedita aur uski chhoti behen samet paanch gawah pesh kiye. Peedita ne adalat mein isharon se apni baat rakhi, jise chhoti behen ne likhkar bayan ke roop mein darj karaya. Bachav paksh ki or se bhi char gawah pesh hue, jinhone maarpeet hone ki baat kahi.

Sabooton aur gawahon ke aadhar par adalat ne aaropi ko doshi mana aur saja ke sath jurmana lagaya.

Bachav paksh ki daleelein, jo adalat mein nahi tiki

Aaropi ke adhivakta ne kai tark diye:

• Vivechak ne ghatnasthal ke aaspaas ke logon ko gawah nahi banaya.
• Doctor ne dushkarm ki spasht pushti nahi ki.
• Prathmiki ghatna ke do din baad darj karai gayi.
• Koi swatantra gawah pesh nahi kiya gaya.

Adalat ne ye tark swikar nahi kiye. Adalat ne kaha ki vivechna ki kami ka labh aaropi ko nahi diya ja sakta aur do din baad prathmiki darj karana deri ki shreni mein nahi aata. Swatantra gawah ke sawal par adalat ne kaha ki jis vyakti ki beti mansik roop se kamzor ho, vah samaj mein kalank mane jane wala aisa aarop apni pratishtha daanv par lagakar yun hi nahi lagayega.