Hardoi mein dardnak hadsa: pani se bhare gehre gaddhe mein giri car, pati-patni aur 3 mah ke bachche ki maut; ek yuvak gambhir
Deepawali ka tyohar manane ghar laut raha ek parivar Hardoi mein bhishan sadak hadse ka shikar ho gaya. Bilgram-Kannauj marg par Jafarpur mod ke paas shukravar tadke ek car aniyantrit hokar puliya se niche pani se bhare gehre gaddhe mein ja giri. Hadse mein car sawar pati-patni aur unke teen mah ke bachche ki maut […]
Gurugram se Deepawali manane ghar laut raha tha parivar
Mritakon ki pehchan Ramesh Kumar (35), unki patni Neelam (32) aur unke teen mah ke bachche ke roop mein hui hai. Ramesh mool roop se Hardoi jile ke Sursa thana kshetra ke gram Sarra ke nivasi the. Unka parivar filhal Chand Behta mein reh raha tha aur Ramesh Haryana ke Gurugram mein kaam karte the.
Deepawali ka tyohar manane ke liye Ramesh shukravar tadke apni patni, masoom bachche aur sathi Aditya Kumar ke sath car se ghar laut rahe the. Isi dauran Bilgram-Kannauj marg par Jafarpur mod ke paas unki car aniyantrit ho gayi aur puliya se niche pani se bhare gehre gaddhe mein ja giri. Hadsa shukravar subah karib 3:30 baje hua.
Rassi ki madad se bahar nikala gaya ghayal yuvak
Car ke pani mein girne ke baad mauke par afra-tafri mach gayi. Cheekh-pukar sunkar aaspaas ke gramin ghatnasthal par pahunche aur police ko soochna di. Police aur graminon ne milkar rahat evam bachav karya shuru kiya.
Kafi mashakkat ke baad car sawar Aditya Kumar ko rassi ki madad se bahar nikala gaya. Vah gambhir halat mein aur achet tha. Iske baad sabhi ko ambulance se Kannauj jila aspatal pahunchaya gaya.
Aspatal mein teen logon ko mrit ghoshit kiya
Aspatal mein chikitsakon ne Ramesh Kumar, unki patni Neelam aur teen mah ke masoom ko mrit ghoshit kar diya. Gambhir roop se ghayal Aditya Kumar ka upchar jaari hai. Hadse ki khabar milte hi parijanon mein kohram mach gaya. Police ne teenon shavon ko kabze mein lekar avashyak kanooni karravai shuru kar di hai.
