Odisha mein chakravat Arnab ka kahar: bhuskhalan ke 7 din baad malbe se mile ek hi parivar ke 5 shav, teen masoom bhi shamil

Prashasan ke anusar, yeh hadsa 28 October ki raat Kandhamal aur Ganjam jile ki seema par sthit Gangabali pahadi ke paas hua tha. Pahadi se bhari matra mein mitti aur patthar khisakkar niche base gaon par aa gire, jisse kai ghar malbe mein dab gaye.

Malbe se mile paanchon shavon ki hui pehchan

Mritakon ki pehchan Vijay Pradhan (25), unki patni Bhumika Pradhan (27) aur unke teen bachchon Arun (7), Vijaylakshmi (6) aur Bagri (1) ke roop mein hui hai. Sabhi Gidipabali gaon ke nivasi the. Parijanon ne shavon ki pehchan ki. Parivar ki ichha ke anusar prashasan ki madad se ghatnasthal par hi paanchon ka antim sanskar kiya gaya.

Is bhuskhalan mein isse pehle do anya logon ke shav baramad kiye ja chuke the. Is tarah Gidipabali mein hadse se marne walon ki sankhya badhkar saat ho gayi hai. Prashasan ke mutabik, abhi chhah log lapata hain aur unki talash jaari hai.

28 October ki raat pahadi se aaya malba, nau ghar hue tabah

Yeh hadsa 28 October ki raat Kandhamal aur Ganjam jile ki seema par sthit Gangabali pahadi ke paas hua tha. Chakravat Arnab ke prabhav se hui bhari barish ke baad pahadi se mitti, bade-bade patthar aur ped niche ki or behne lage. Iski chapet mein aakar Gidipabali gaon ke kam se kam nau ghar puri tarah nasht ho gaye.

Bhuskhalan ke waqt kai log apne gharon mein so rahe the. Achanak aaye malbe ne unhe sambhalne ka mauka tak nahi diya. Hadse ke baad kai gramin lapata ho gaye the, jiske baad prashasan ne bade star par bachav abhiyan shuru kiya.

NDRF aur ODRAF ki teemein talash mein jutin

Lapata logon ko khojne ke liye Rashtriya Aapda Pratikriya Bal (NDRF), Odisha Disaster Rapid Action Force (ODRAF), agnishaman seva aur jila prashasan ki teemein lagatar kaam kar rahi hain. Bachav abhiyan mein badi sankhya mein jawanon ko lagaya gaya hai.

Rahat aur bachav karya mein sabse badi chunauti bhari chattanein, durgam pahadi raaste aur sadak sampark ka abhav hai. Kuch chattanein itni badi hain ki unhe hatane ke liye bhari mashinein ghatnasthal tak pahunchana bhi mushkil ho raha hai. Lagatar barish aur dobara bhuskhalan ki aashanka ke karan abhiyan ko beech mein rokna bhi pada tha.

Kandhamal ke jiladhikari Vedbhushan ke mutabik, mausam mein sudhar ke baad talashi abhiyan ko aage badhaya gaya hai. Paanch shav milne ke bavjood prashasan ne spasht kiya hai ki baki lapata logon ki talash jaari rahegi.

Is hadse ne Gidipabali gaon ke kai parivaron ko gehre sadme mein daal diya hai. Ek hi parivar ke paanch sadasyon ki maut ne pure ilake ko shok mein dubo diya hai.