Solar Defence ne sena ko saunpe 450 Nagastra-1R loitering munition, company ka daava: ek baar mein sabse badi aapoorti
Solar Defence and Aerospace Limited (SDAL) ne Bharatiya sena ko Nagastra-1R loitering munition ki 450 ikaiyon ki aapoorti ek hi khep mein poori kar di hai. Company ke anusaar, kisi bhi nirmata dwara sena ko ek baar mein di gayi loitering munition ki yeh sabse badi khep hai. Sena ne yeh order emergency procurement ke […]
Parikshanon mein company ke khara utarne ka daava
Company ke mutabik, March 2025 mein hue takniki parikshanon mein chaar companiyon ne hissa liya tha. Inmein keval SDAL hi sabhi operational manakon par khari utri. Company ka kehna hai ki system ki satikta ko kai live trial mein lakshya par nishana lagane ki kshamta ke aadhar par parkha gaya.
Kya hai Nagastra-1R ki khasiyat
Company ke anusaar, Nagastra-1R ko sena ki vishesh zarooraton ke hisab se taiyaar kiya gaya hai. Iska istemaal kam doori ke abhiyanon mein kamikaze hamle ke liye kiya ja sakta hai, yani aisa hamla jisme munition lakshya se takrakar khud nasht ho jaata hai. Ismein mission ko beech mein radd karne aur drone ko surakshit wapas hasil karne ka vikalp bhi diya gaya hai.
Nagastra-1 ki prishthbhumi
Swadeshi loitering munition Nagastra-1 ko Solar Industries Nagpur ki sahayak company Economic Explosives Limited (EEL) ne Bengaluru ki company Z-Motion ki madad se design aur viksit kiya hai. Company ka daava hai ki ismein 75 feesadi se zyada swadeshi samagri hai.
Aage ki yojana
Company ab apni loitering munition pranaliyon ki tainati ka vistaar karne aur Bharatiya sashastra balon ke saath deerghkalik sahyog badhane par dhyan de rahi hai.
Iran, America aur Israel ke beech jaari sangharshon ke sandarbh mein is swadeshi pranali ko kam laagat mein satik hamle ki kshamta wala vikalp bataya ja raha hai. Haal ke sangharshon mein drone taknik ki bhumika aham rahi hai, khaaskar Armenia-Azerbaijan, Syria, Saudi Arabia ke tel kshetron aur Russia-Ukraine ke mamlon mein.
